გამარჯობა,
მე გიორგი მახარობლიძე ვარ, ცაგერის რაიონის სოფელ ლაჯანადან. პროფესიით იურისტი, თუმცა ამჟამინდელი საქმიანობა ჩემთვის მართლაც რომ საყვარელ საქმეს - მეფუტკრეობას უკავშირება. 2014 წლიდან მოშენებული მყავს ფუტკარი და სიამაყით გეტყვით რომ უკვე 2 წელია რაც ბიო წარმოებაში ჩავერთე და მალე ბიო სერტიფიკატის მფლობელიც გავხდები. მეწარმეობის 8 წლიან ისტორიაში ჩემთვის გარდამტეხი ეტაპი იყო, ევროკავშირის, შვედეთის და ავსტრიის ერთობლივი ინიციატივა პროექტ GRETA-ს სახით, რომლის ფარგლებშიც მიღებულმა დახმარებამ, უმნიშვნელოვანესი როლი ითამაშა ჩემი საქმიანობის სამომავლო პერსპექტივების განსაზღვრაში.
პროექტის შესახებ, ინტერნეტის მეშვეობით შევიტყვე. ადრეც ვიყავი დაინტერესებული საგრანტო პროგრამებით და თვალყურს ვადევნები სხვადასხვა საიტებს, სადაც ქვეყნდებოდა მიმდინარე თუ ახალი პროექტები. პროექტმა GRETA-მ ჩემი განსაკუთრებული დაინტერესება გამოიწვია, რადგან ბიო მიმართულებაზე აკეთებდა აქცენტს, თან ჩვენს რეგიონს მოიცავდა და მყისიერად გადავწყვიტე ხელიდან არ გამეშვა ეს შესაძლებლობა. დეტალურად გადავხედე ინფორმაციას, რომელიც საკმაოდ კარგად და გასაგებად იყო ჩამოყალიბებული. შევავსე განაცხადი, გავიარე სტანდარტული ეტაპები და განაცხადის განხილვის პროცესშივე მოხდა ჩემი საქმიანობის ადგილზე შემოწმება. ბოლო ეტაპზე გადასვლისას მივიღე სასიამოვნო შეტყობინება რომ საგრანტო კონკურსში გავიმარჯვე და აქედან დაიწყო ჩემი საქმიანობის განვითარების შემდეგი ეტაპი.
შევეცდები მცირედი ინფორმაცია გაგიზიაროთ მეფუტკრეობის საწარმოო საქმინაობაზე, რომ უფრო გასაგები იყოს რამდენად მნიშვნელოვანი იყო დონორებისგან მიღებული მხარდაჭერა. დავიწყებ სპეციალური დანადგარის ე.წ. „ჰომოგენიზატორის“ მიღებით, რომელიც ახდენს სხვადასხვა სახეობის თაფლის შერევას. უფრო ზუსტად რომ ვთქვათ: განსხვავებულ სკებში როცა დაიწურება თაფლი, მერე ხდება ჰომოგენიზაცია რათა მივიღოთ ერთი გემო. ეს დანადგარი ასევე ახდენს დეკრისტალიზაციას, ანუ თაფლი დროთა განმავლობაში კრისტალდება და საჭიროა მისი დეკრისტალიზაცია. შემდეგია ფიჭის ამთლელი მაგიდა, სადაც ხდება ფიჭების ათლა და შემდეგ გაწურვა. მომდევნო ეტაპია უჟანგავი ლითონის ჭურჭლებში თაფლის მოთავსება, სადაც ვახდენთ თაფლის შენახვას და გვაძლევს შესაძლებლობას ჩვენი სურვილისამებრ შესაფერის დროს გავყიდოთ ნაწარმი. ბოლო და დამაგვირგვინებელი ეტაპია ბიო სერტიფიცირება, რომლის ერთი წლის გადასახადის დაფარვა, დონორების ფინანსურმა მხარდაჭერით განხორციელდა, რამაც შსაძლებელი გახადა როგორც წარმოების გამართვა, ასევე ბიო წარმოებაზე გადასვლა. აქამდე, ჩვეულებრივი საფუტკრე მეურნეობა გვქონდა. მინდა გაგიზიაროთ, თუ რატომ მიმაჩნია ბიო წარმოება ჩვენს სექტორში განსაკუთრებულ წარმატებად: ბიო პროდუქციის წარმოების შემთხვევაში რაოდენობა არ იმატებს, სამაგიეროდ იმატებს მისი ხარისხი, რაც ნამდვილად უმნშვნელოვანესია. შესაბამისად მასზე მოთხოვნაც სულ ურო და უფრო იზრდება და პროდუქტის ფასის მატება მომხმარებლისთვის შეფასების კრიტერიუმი აღარ არის.
ჩემი ამბის მიწურულს, მინდა საკუთარი მცირედი გამოცდილებიდან სხვა მეწარმეებსაც ვურჩიო, რომ ხარისხზე და ეკოლოგიურ წარმოებაზე გააკეთონ ფოკუსირება.
აუცილებლად ვგეგმავ საფუტკრის გაფართოებას, ოჯახების გაზრდას, როგორც შიდა ბაზრის ათვისებას, ისე ექსპორტზე გასვლასაც. ასევე მალე მექნება ბრენდირება და დაახლოებით 5-ჯერ მეტი რაოდენობის სკის შეძენას ვგეგმავ. ჩემი სამომავლო გეგმების სისრულეში მოყვანისთვის და ახალი გამოცდილებების მისაღებად მზად ვარ თანამშრომლობისთვის და საკონტაქტოდ ხელმისაწვდომი ვარ ელ ფოსტის საშუალებით: gmakharoblidze.kyp@gmail.com
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის